Header Ads

வெற்றிப் படிக்கட்டுகள் - பலமா? பலவீனமா?

வெற்றிப் படிக்கட்டுகள் 
தொடர் - 3

பலமா? பலவீனமா?

"தமிழக மாணவர் வழிகாட்டி" மாத இதழில் நெல்லை கவிநேசன் எழுதிவரும் தொடர் "வெற்றி படிக்கட்டுகள்". அந்தத் தொடர்க் கட்டுரையின் முழு வடிவத்தை இப்போது காணலாம்.

வாழ்க்கையில் வெற்றி பெற நினைப்பவர்கள் கண்டிப்பாக சிறந்த குறிக்கோள்களை முதலிலேயே தீர்மானித்துக்கொள்ள வேண்டும். எங்கே செல்ல வேண்டும்? என்பதை முடிவு செய்தபின்புதான், எப்படி போகவேண்டும்? என்பதை தீர்மானிக்க இயலும். இதைப்போலத்தான் வாழ்க்கையில் நாம் என்ன ஆக வேண்டும்? என்பதை முன்கூட்டியே முடிவு செய்தவர்கள் எதிர்பார்த்த இலக்கை எளிதில் சென்றடைகிறார்கள். 

எனவே, ஒரு குறிக்கோளை நிர்ணயிப்பதற்குமுன்பு, அந்தக் குறிக்கோளை நம்மால் நிறைவேற்ற இயலுமா? என்னும் கேள்வியை முதலில் நமக்குள் கேட்டுக்கொள்ள வேண்டும். அந்தக் கேள்விக்கான விடையின் அடிப்படையில் குறிக்கோளை நிர்ணயிக்க வேண்டும். 

இதனால்தான், குறிக்கோளை நிர்ணயிப்பதற்குமுன்பே முதலில் ஒருவர் தனது பலம் (Strength) என்ன? பலவீனம் (Weakness) என்ன? வாய்ப்புகள் (Opportunities) என்ன? தடைகள் (Threats) என்ன? என்பதை தெளிவாகத் தெரிந்துகொள்ள வேண்டும். 

இப்படி பலம், பலவீனம், வாய்ப்புகள், தடைகள் ஆகியவற்றைப்பற்றி தெளிவாகத் தெரிந்துகொள்ள உதவும் நுணுக்கத்தை “ஸ்வாட் அனாலிஸிஸ்” (SWOT Analysis) எனக் குறிப்பிடுவார்கள். 

ஒருவர் “ஸ்வாட் அனாலிஸிஸ்” செய்துகொள்வதன்மூலம் தன்னைப் பற்றிய தற்போதைய நிலையை அறிந்து கொள்ளலாம். மேலும், எதிர்காலத்தில் எவ்வாறு நடந்துகொள்ள வேண்டும்? என்பதற்கான வழிமுறைகளையும் தெரிந்து கொள்ளலாம். இதன்மூலம், புதிய திட்டங்களை உருவாக்குவதற்கான யுக்திகளையும் (Strategy) வடிவமைக்கலாம். 

பொதுவாக, ஒருவரின் ‘பலம்’ (Strength) என்பது அவரிடமுள்ள நேர்மறை (Positive) எண்ணங்களை வெளிப்படுத்தும் வகையில் அமைகிறது. 

உங்களிடம் பலம் இருக்கிறதா? இல்லையா? என்பதை கீழ்க்கண்ட சில கேள்விகளின்மூலம் நீங்களே அறிந்துகொள்ளலாம். 
  • “மற்றவர்களிடம் இல்லாத திறமைகள், உங்களிடம் என்னென்ன உள்ளன?.
  • “உங்கள் சாதனைகளில் நீங்கள் எவற்றையெல்லாம் முக்கியமானதாகக் கருதுகிறீர்கள்? 
  • உங்கள் சாதனைகளில் நீங்கள் அதிகம் விரும்புவது எது?”. 
  • “உங்களது பலமாக மற்றவர்கள் எவற்றையெல்லாம் கருதுகிறார்கள்?”.
  • உங்களிடமுள்ள திறமைகளைப்போல சிறந்தத் திறமைகள் தங்களிடம் இருந்தும், மற்றவர்கள் எந்தெந்த திறமைகளை வெளிக்காட்ட தவறி இருக்கிறார்கள்? 
-மேலே குறிப்பிட்டுள்ள கேள்விகளுக்கு தெளிவாகப் பதில் அளிப்பதன்மூலம் ஒருவர் தனது பலத்தைத் தெரிந்துகொள்ளலாம். 

ஒருவர் மனது வைத்தால் தனது பலத்தை அதிகரிக்க இயலும். 

ரமேஷ் பத்தாம் வகுப்பு படிக்கும் பள்ளி மாணவன். 70 சதவீதம் மதிப்பெண்கள் பெற்றிருந்தான். 

“மிக அதிக கவனத்தோடு படித்தால், நீ உனது மதிப்பெண்களை அதிகரிக்கலாம்” என்று அவனது ஆசிரியர் ஆலோசனை சொன்னார். 

“தனது பலத்தை அதிகரிக்க வேண்டும்” என்று எண்ணிய ரமேஷ் நன்கு கவனத்தோடு படித்தான். தனது மதிப்பெண்களை 92 சதவீதத்திற்கு உயர்த்திக்கொண்டான். 

ஒருவர் தனது பலத்தின் (Strength) தன்மையை உணர்ந்துகொண்டால், அதனை உயர்த்துவதற்கான முயற்சிகளில் ஈடுபட முடியும். 

இதைப்போலவே, ஒருவர் தனது ‘பலவீனங்களையும்’ (Weaknesses) தெளிவாகத் தெரிந்துகொள்ள வேண்டும். பலவீனங்களைத் தெரிந்துகொள்ள உதவும் சில கேள்விகள்:
  • உங்களிடமுள்ள என்னென்ன பலவீனங்கள் உங்கள் குறிக்கோளை நீங்கள் அடையமுடியாமல் உங்களின் கவனத்தை திருப்புகின்றன? 
  • உங்களைச் சுற்றியிருப்பவர்கள் உங்களது பலவீனங்களாக எவற்றையெல்லாம் கருதுகிறார்கள்? 
  • உங்கள் வளர்ச்சிக்கு உதவாத எதிர்மறை பழக்க வழக்கங்களாக (Negative Positive) நீங்கள் எதனைக் கருதுகிறீர்கள்?
  • உங்களது வளர்ச்சியைத் தடுக்கும் விதத்தில் அமையும் குணங்களை எதிர்கொள்ளத் தேவையான ஆளுமைப் பண்புகள் உங்களிடம் உள்ளதா?
  • பொதுவாக, நீங்கள் எந்தெந்த செயல்களையெல்லாம் தவிர்த்துவிடுகிறீர்கள்? 
  • உங்கள் வளர்ச்சிக்கு உதவும் எந்தெந்த செயல்களையெல்லாம் உங்களால் செய்ய முடியாது என நீங்கள் கருதுகிறீர்கள்? 
  • உங்களது பலவீனம் என நீங்கள் கருதாதபோதிலும், “உங்களின் பலவீனம் இதுதான்” என மற்றவர்கள் எவற்றையெல்லாம் குறிப்பிடுகிறார்கள்? 
-இந்தக் கேள்விகளுக்கான விடைகள் உங்களின் பலவீனங்களை நீங்களே கண்டறிய உதவும். 

புஷ்பா ஒரு கல்லூரி மாணவி. கல்லூரி நாள் விழா கலைநிகழ்ச்சியில் கலந்துகொள்ள விரும்பினாள். கல்லூரி நாள் கலைவிழாவிற்காக மாணவிகளைத் தேர்வு செய்யும்போது அவளும் கலந்துகொண்டாள். குழு நடன நிகழ்ச்சியில் அவள் தேர்ச்சி பெறவில்லை. கவலைப்பட்டாள். கண்ணீர் வடித்தாள்.

“புஷ்பா நீ கவலைப்படாதே! கல்லூரி நாள் விழாவிற்கு இன்னும் 10 நாட்கள் இருக்கிறது. போதிய பயிற்சி இல்லாததுதான் உனது தோல்விக்குக் காரணம். உனது பலவீனத்தை எண்ணி வருந்தாதே. இரண்டு நாட்கள் நல்ல பயிற்சி எடுத்துக்கொள். உன்னை விழா நிகழ்ச்சியில் கலந்துகொள்ள அனுமதிப்பார்கள்” என்று அவளது தோழி சொன்னாள். 

புஷ்பா தனது பலவீனத்தை உணர்ந்தாள். தொடர்ந்து பயிற்சிகள் மேற்கொண்டாள். சிறப்பாக நடனம் ஆடுவதை நிரூபித்தாள். கல்லூரி நாள் விழாவில் அவளது நடனம் சிறப்பாக அரங்கேறியது. 

தனது பலவீனத்தை உணர்ந்துகொண்டு அந்தப் பலவீனத்தை தனது பலமாக மாற்ற முயற்சிகள் மேற்கொண்ட புஷ்பா வெற்றி பெற்றாள்.

பலவீனங்களாக கோபம், எரிச்சல், மறதி, பதற்றம், மன அழுத்தம், பகை, சோர்வு, கவலை போன்றவைகள் மனிதர்களின் மனதில் அவ்வப்போது தலைதூக்கி நிற்கின்றன. அவை முன்னேற்றத்திற்கு முட்டுக்கட்டைப் போடுகின்றன. எனவே, பலவீனத்தை பலமாக மாற்றும் முயற்சியில் ஈடுபடுவது சிறந்த பலனைத் தரும்.

உங்களது பலத்தையும், பலவீனத்தையும் கண்டறிந்தபின்பு, உங்களுக்கு உதவும் வாய்ப்புகளாக (Opportunities) நீங்கள் எதனைக் கருதுகிறீர்கள்? என்றும் சிந்திக்க வேண்டும். வாய்ப்புகள் என்பது வெளிப்புற சூழலைக் (External Environment) குறிக்கும். இந்த வெளிப்புற சூழல்கள்தான் ஒரு தனிமனிதனின் வளர்ச்சிக்கு அடிப்படையாக அமையும்.

உங்கள் வாய்ப்புகளைக் (Opportunities) கண்டறிய இதோ சில கேள்விகள்:
  • நீங்கள் எவற்றையெல்லாம் உங்களது வாய்ப்பாக கருதுகிறீர்கள்?
  • எந்தெந்த புதிய தொழில்நுட்பங்களை நீங்கள் பயன்படுத்துகிறீர்கள்?
  • நீங்கள் பயன்படுத்தும் புதிய தொழில்நுட்பங்கள் உங்களுக்கு உதவியாக அமைகிறதா? 
  • நீங்கள் வைத்திருக்கின்ற தொடர்புகள் உங்கள் வளர்ச்சிக்கு உதவுகிறதா?
  • உங்களோடு தொடர்புடையவர்கள் உங்களின் முன்னேற்றத்திற்கு ஆலோசனைகள் வழங்குகிறார்களா? 
- இந்தக் கேள்விக்கான விடைகள் உங்களின் வாய்ப்புகளைக் கண்டறிய எளிதாக அமையும்.

வாய்ப்புகளாக (Opportunities) வெளிப்புற சூழல்கள் அமைகின்றன. குறிப்பாக - அன்பான அப்பா, அரவணைக்கும் அம்மா, பாசம்காட்டும் தம்பிகள், நேசத்தோடு பழகும் தங்கைகள், உணர்வோடு கைகொடுக்கும் உறவுகள், உள்ளன்போடு பழகும் ஊர்க்காரர்கள், நல்ல வீடு, படித்தவர்கள் நிறைந்த சூழல், நல்ல மனம் படைத்த நண்பர்கள் - என ஏராளமான வாய்ப்புகள் ஒருவரைச்சுற்றி அமைகின்றன. இந்த வாய்ப்புகளை சரியாகப் பயன்படுத்தினால், ஒருவரால் எளிதில் சிறந்த வெற்றியைப் பெற முடியும். 

ஒருவருடைய மனம் சிறந்ததாக அமைந்தால், இந்த வாய்ப்புகளையெல்லாம் நல்லமுறையில் பயன்படுத்தி முன்னேற முடியும். ஆனால், அதேவேளையில் வாய்ப்புகளையெல்லாம் பயன்படுத்தாமல் வெளிப்புற சூழல்களில் காணப்படும் பிரச்சினைகளை மட்டுமே மனதில் பதியவைத்து வாழும்போது எதிர்மறை எண்ணங்கள் ஏராளமாகிவிடுகின்றன. நல்ல வாய்ப்புகள்கூட தடையாக மாறிப்போய்விடுகின்றன. எனவே, வாய்ப்புகளை நல்லமுறையில் பயன்படுத்தும் வகையில் சிந்தனைகளை சீராக்கிக்கொள்வது நல்லது.

உங்களின் வாய்ப்புகளைப்போலவே உங்களுக்கான தடைகளையும் (Threats) அறிந்துகொள்ள வேண்டும். உங்கள் முன்னேற்றத்திற்கு எந்தெந்த வெளிப்புற காரணிகள் எல்லாம் தடையாக இருக்கிறது? என்பதை அறிந்துகொள்ள கீழ்க்கண்ட சில கேள்விகள் உதவும். 
  • தற்போது நீங்கள் உங்கள் வாழ்க்கையில் சந்திக்கும் தடைகள் எவை?
  • புதிய தொழில்நுட்பம் உங்கள் வளர்ச்சிக்குத் தடையாக இருக்கிறதா?
  • உங்களது பலவீனங்கள் தடைகளை உருவாக்குகிறதா? 
- இந்தக் கேள்விகளுக்கான விடைகள்மூலம் நீங்கள் உங்களுக்கு சவாலாகத் தோன்றும் தடைகளை அடையாளம் காணலாம். 

தடைகள் (Threats) என்பது ஒருவரின் முன்னேற்றத்திற்கு இடையூறு செய்யும் வகையில் அமையும் சூழல் (Environment) ஆகும். வெளிப்புற சூழலில் நண்பர்கள், உறவினர்கள், ஊர்க்காரர்கள், சாதி, மதம், அரசியல், தொழில்நுட்பம், சமூகம் போன்றவைகள் ஒருவரின் முன்னேற்றத்திற்குத் தடையாக அமையலாம். ஆனால், “இதுதான் எனக்குத் தடையாக இருக்கிறது” என்பதை ஒருவர் முன்கூட்டியே தெரிந்துகொள்ள வேண்டும். அப்படி தெரிந்துகொண்டால்தான் அந்தத் தடையைத் தாண்டி செயலாற்ற முடியும். 

விளையாட்டுப் போட்டிகளில் ‘தடை தாண்டி ஓடும் போட்டி’ (Obstacle Race) என்னும் ஒரு போட்டி உள்ளது. இந்தப் போட்டியில் ஓடுகளத்தில் பல்வேறு தடைகளை அடுக்கி வைப்பார்கள். அந்தத் தடைகளையெல்லாம் தாண்டி, சிறந்த முறையில் ஓடி முதல் இடத்தைப் பெற்றால், வெற்றி வீரராக அவரைக் கருதுகிறார்கள். இதைப்போலத்தான் எண்ணற்ற தடைகள் ஒவ்வொருவர் வாழ்விலும் ஏராளமாக வந்து குவிகின்றன. “அந்தத் தடைகள் இவைதான்” என்பதை அடையாளம்கண்டு அந்தத் தடைகளைத் தாண்டுவதற்கான பயிற்சிகளை மேற்கொண்டால், சிறந்த வெற்றிகளைப் பெறலாம்.

“ஸ்வாட் அனாலிஸிஸ்” (SWOT Analysis) என்பது தனது பலம் (Strength), பலவீனம் (Weakness), வாய்ப்புகள் (Opportunities), தடைகள் (Threats) இவைகளை முன்கூட்டியே அறிந்துகொள்வதற்கான பயிற்சி என்பதை முதலிலேயே புரிந்துகொண்டு செயலாற்றினால் எந்தச்சூழலிலும் வெற்றி பெறலாம். 

இதோ ஒரு பயிற்சி. 

கீழே கொடுக்கப்பட்டுள்ள வரிசையில் உங்களது பலம், பலவீனம், வாய்ப்புகள், தடைகள் ஆகியவற்றை முதலில் குறித்துக் கொள்ளுங்கள். பின்னர், உங்களது பலவீனத்திற்கான காரணங்களையும் அறிந்துகொள்ளுங்கள். உங்கள் பலவீனங்களை பலமாக மாற்றும் முயற்சியில் ஈடுபடுங்கள். இதேபோல் உங்கள் முன்னேற்றத்திற்கான தடைகளை அடையாளம் காணுங்கள். பின்னர், தடைகளுக்கான காரணத்தை அறிந்து அவற்றை வாய்ப்புகளாக மாற்ற முயற்சிகளை மேற்கொள்ளுங்கள். 

பலம் (Strength)
1.
2.
3.
4.
5.

பலவீனம் (Weaknesses)
1.
2.
3.
4.
5.

வாய்ப்புகள் (Opportunities)
1.
2.
3.
4.
5.

தடைகள் (Threats)
1.
2.
3.
4.
5.

இந்தப் பயிற்சியை நீங்கள் மாதந்தோறும் மேற்கொண்டால், உங்கள் பலவீனங்கள் எல்லாம் பலமாக மாறும். தடைகளையெல்லாம் வாய்ப்புகளாகவும் மாற்றிக்கொள்ளலாம். வெற்றிப் பாதையில் நீங்கள் வீறுநடைபோடலாம்.

No comments

Powered by Blogger.